Sporo i složeno izdavanje dozvola jedna je od glavnih prepreka razvoju projekata obnovljivih izvora energije na Zapadnom Balkanu, zbog čega je potrebno unaprijed odrediti područja pogodna za izgradnju solarnih i vjetroelektrana. To je jedna od preporuka novih smjernica Centra za ubrzanje razvoja obnovljivih izvora energije pri Sekretarijatu Energetske zajednice.
Prema podacima za 2024. godinu, na Zapadnom Balkanu je bilo 23 GW projekata solarnih i vjetroelektrana u razvoju, dok je u pogonu svega 1,5 GW kapaciteta. Nacionalni energetski i klimatski planovi predviđaju izgradnju dodatnih oko 10 GW do 2030. godine.
Kako bi se ubrzala realizacija planiranih investicija, smjernice preporučuju da nadležne institucije prestanu da svaki projekat razmatraju pojedinačno i da unaprijed odrede područja pogodna za ubrzani razvoj obnovljivih izvora energije.
Riječ je o takozvanim područjima za ubrzani razvoj obnovljivih izvora energije (RAA), predviđenim revidiranom Direktivom EU o obnovljivim izvorima energije (RED III). Njihovim određivanjem unaprijed bi se procijenili mogući uticaji na životnu sredinu, namjena zemljišta i druga ograničenja, čime bi se pojednostavili kasniji postupci izdavanja dozvola.
Pročitajte još:
- EPCG potpisala četiri sporazuma o saradnji za razvoj obnovljivih izvora energije i smanjenje emisija
- EU može dodati 25 GW obnovljivih izvora zahvaljujući postojećim hidroelektranama
- ENTSO-E priprema nova pravila za stabilniju evropsku elektroenergetsku mrežu u eri obnovljivih izvora
Kao posebno pogodne lokacije izdvajaju se bivši rudnici, industrijska i druga degradirana područja, gdje je manja vjerovatnoća sukoba sa drugim namjenama zemljišta i interesima zaštite prirode.
Smjernice takođe ukazuju na potrebu boljeg povezivanja podataka o potencijalu obnovljivih izvora energije, biodiverzitetu, infrastrukturi i elektroenergetskoj mreži, kao i efikasnije koordinacije institucija nadležnih za energetiku, prostorno planiranje i zaštitu životne sredine.
Centar već primjenjuje ovaj pristup u Bitolju u Sjevernoj Makedoniji i Elbasanu u Albaniji, gdje podržava razvoj projekata obnovljivih izvora energije na lokacijama nekadašnjih rudnika uglja i metalurških postrojenja.
Ubrzavanje izdavanja dozvola, kako se navodi u smjernicama, važno je ne samo za ostvarivanje klimatskih ciljeva i približavanje Evropskoj uniji već i za jačanje energetske sigurnosti regiona.